Статья в газете "Чолман" "Кужнур ялын «пеледышышт-влак».

 Оҥай еҥ да коллектив-влак нерген Россий калыкын Тӱвыра поянлык идалыкше дене кылдалтше материал-влакым савыкташ тений кок рубрикым почына: «Мастар-влак» да «Пошкырт кундемысе марий ансамбль-влак». Шкендан нерген (кидмастар-влакымат ушнаш ӱжына) почто гоч, редакцийын электрон адресышкыже cholman@mail.ru але газетын vk.com/cholman лаштыкышкыже возен колтымыдам вучен кодына.

Кужнур ялын «пеледышышт-влак».
Кажне калыкын – шке йӱлаже, шке койыш-шоктышыжо. Марий-влакын мурымаш-куштымашышт моло калыкын деч ойыртемалтше семынак Кужнур ялын фольклорный калык коллектив «Нур пеледыш» поснак ойыртемалтеш. Ансамбльлан 2000 ийыште калык лӱмым пуымо. Выступатлымыжым ужшо-влак тудым нигӧ дене огыт пулаштаре. Репертуарышкыже шагал огыл ожсо марий, шочмо элым, пӱртӱсым моктымо, йӧратымаш нерген муро-влакым пуртымо. Коллективын рӱдыжо 1986 ийыште чумырген. Кажныжын ешыже, шукыштын уныкаштат уло гынат, мураш-кушташ йӧратыше-влак чонышт дене эре самырык кодыт, шке усталыкыштым вияҥден шогат. «Нур пеледышым» Уфаште, Йошкар-Олаште, Мишканыште, Калтасаште да моло вереат палат, а Бирск ола урем дене ошкылмо годым ончышо-влак саламлалт эртат. Коллективна тӱрлӧ конкурсыш да фестивальыш коштеш, ятыр диплом да Чап грамота дене палемдалтын. Икымше февральыште шкенжын лӱмжым пенгыдемдаш ямдылалтеш.

З. МИХАЙЛОВА, «Нур пеледыш» коллективын вуйлатышыже.
Кужнур ял, Пӱрӧ район.

https://vk.com/feed?w=wall-99044573_14386